મિડલ ઈસ્ટમાં વધી રહેલા ભારે તણાવ વચ્ચે એક મોટા રાજકીય અને સૈન્ય ધમાકાના એંધાણ મળી રહ્યા છે. ઇરાનના સુપ્રીમ લીડરે દેશના તમામ સશસ્ત્ર દળો (Armed Forces) ને યુદ્ધસ્તરની સજ્જતા જાળવી રાખવા અને કોઈપણ દુશ્મન સામે આક્રમક વળતો પ્રહાર કરવા માટે નવી માર્ગદર્શિકા જારી કરી છે. વૈશ્વિક વિશ્લેષકોના મતે ઇરાન અને પશ્ચિમી દેશો વચ્ચે બેકગ્રાઉન્ડમાં “કંઈક મોટું રંધાઈ રહ્યું છે”, જે ગમે ત્યારે મોટી સૈન્ય કાર્યવાહીમાં પરિણમી શકે છે.
કમાન્ડરો સાથે ઇમરજન્સી બેઠક અને ગાઇડલાઇન્સ
ઇરાની મીડિયા અને સત્તાવાર સૂત્રો મુજબ, ઇરાનના ટોચના સૈન્ય કમાન્ડરોએ સુપ્રીમ લીડરને વર્તમાન સુરક્ષા સ્થિતિ અને સૈન્યની ક્ષમતાઓ અંગે વિસ્તૃત બ્રીફિંગ આપી હતી. આ બેઠક બાદ સુપ્રીમ લીડર તરફથી દળોને નવી “માર્ગદર્શક સૂચનાઓ” (Guiding Measures) આપવામાં આવી છે. જેમાં સ્પષ્ટ કરાયું છે કે જો દુશ્મન પક્ષ દ્વારા કોઈ પણ નાની ભૂલ કે ઉશ્કેરણી કરવામાં આવશે તો તેનો ક્ષણવારમાં અને ભયાનક જવાબ આપવામાં આવશે.
ડ્રોન, મિસાઈલ યુનિટ્સ અને નેવી એલર્ટ મોડ પર
ઇસ્લામિક રિવોલ્યુશનરી ગાર્ડ કોર્પ્સ (IRGC) ના એરોસ્પેસ અને નેવલ ફોર્સિસ દ્વારા ખુલ્લી ચેતવણી આપવામાં આવી છે કે તેમની મિસાઈલો અને સશસ્ત્ર ડ્રોન સિસ્ટમ સંપૂર્ણપણે તૈનાત છે. ઇરાની કમાન્ડરોના જણાવ્યા અનુસાર, જો પ્રદેશમાં તેમના તેલ ટેન્કરો, વેપારી જહાજો અથવા સૈન્ય સ્થળોને નિશાન બનાવવામાં આવશે, તો પશ્ચિમી અને ઇઝરાયેલી લક્ષ્યાંકો પર સીધો હુમલો કરવામાં આવશે.
વૈશ્વિક સ્તરે ચિંતાનો માહોલ
ઇરાનના સૈન્ય પ્રવક્તાએ દાવો કર્યો છે કે સૈન્ય પહેલ હાલ તેમના હાથમાં છે અને તેઓ કોઈપણ ઈમરજન્સી સ્થિતિને પહોંચી વળવા તૈયાર છે. આ ઘટનાક્રમે વૈશ્વિક બજારો અને આંતરરાષ્ટ્રીય સંગઠનોની ચિંતા વધારી દીધી છે. મિડલ ઈસ્ટમાં યુદ્ધનો વ્યાપ વધવાની આશંકાએ વિશ્વભરની નજર તેહરાનના આગામી કદમ પર ટકેલી છે.
