મોરબીના નવયુગ ગ્રુપ ઓફ એજ્યુકેશન ખાતે શિક્ષણની ગુણવત્તા અને શિક્ષકોના વ્યાવસાયિક વિકાસને કેન્દ્રમાં રાખીને દ્વિ-દિવસીય ટીચર ટ્રેનિંગ સેમિનારનું સફળ આયોજન કરવામાં આવ્યું હતું. સેમિનારમાં વિવિધ શૈક્ષણિક વિષયો, આધુનિક શિક્ષણ પદ્ધતિઓ, વર્ગખંડ વ્યવસ્થાપન, વિદ્યાર્થી કેન્દ્રિત અભિગમ અને નવી શિક્ષણ નીતિના મુદ્દાઓ પર વિસ્તૃત માર્ગદર્શન આપવામાં આવ્યું હતું.
પ્રશિક્ષણ દરમિયાન નિષ્ણાત ટ્રેનર્સે શિક્ષકોને પ્રાયોગિક પ્રવૃત્તિઓ, ચર્ચા-વિચારણા અને ઇન્ટરેક્ટિવ સત્રો દ્વારા અસરકારક શિક્ષણ કૌશલ્ય વિકસાવવા પ્રેરિત કર્યા. શિક્ષકોને બદલાતા શૈક્ષણિક માહોલમાં નવીનતા અપનાવી વિદ્યાર્થીઓ સુધી જ્ઞાન વધુ અસરકારક રીતે પહોંચાડવા માટે ઉપયોગી માર્ગદર્શન મળ્યું.
સેમિનારમાં મોટી સંખ્યામાં શિક્ષકો ઉત્સાહપૂર્વક જોડાયા હતા. તાલીમના અંતે ભાગ લેનાર શિક્ષકોએ આવા કાર્યક્રમોને સમયની માંગ ગણાવી શિક્ષણ ક્ષેત્રે સતત અપડેટ રહેવા માટે ઉપયોગી ગણાવ્યા હતા. આયોજકોએ ભવિષ્યમાં પણ શિક્ષકોના સર્વાંગી વિકાસ માટે આવા તાલીમ કાર્યક્રમો યોજવાની પ્રતિબદ્ધતા વ્યક્ત કરી હતી.
શિક્ષણને વધુ પ્રભાવશાળી, સર્જનાત્મક અને વિદ્યાર્થીમૈત્રી બનાવવા તરફનું આ આયોજન નવયુગ ગ્રુપ ઓફ એજ્યુકેશન માટે વધુ એક મહત્વપૂર્ણ પગલું સાબિત થયું છે.
