ગાંધીનગર: ગુજરાતના નાગરિકોને ડિજિટલ છેતરપિંડીથી બચાવવા માટે ગુજરાત પોલીસે સાયબર ગુનેગારો સામે એક મોટું અને અભૂતપૂર્વ અભિયાન હાથ ધર્યું છે. ‘ઓપરેશન મ્યૂલ હન્ટ ૧.૦’ (Operation Mule Hunt 1.0) અંતર્ગત પોલીસે સાયબર ક્રાઇમ નેટવર્કની કમર તોડી નાખી છે, જેમાં રૂ. ૨,૨૮૯ કરોડના વિશાળ આર્થિક ફ્રોડનો પર્દાફાશ થયો છે.
કેન્દ્ર અને રાજ્ય સરકારના માર્ગદર્શન હેઠળ આ ઓપરેશનને મોટી સફળતા મળી છે. આ સમગ્ર કાર્યવાહીમાં I4C, NCRP પોર્ટલ, ૧૯૩૦ હેલ્પલાઇન અને વિવિધ બેંકો સાથે રિયલ-ટાઇમ કો-ઓર્ડિનેશન (સંકલિત ડેટા) નો ઉપયોગ કરવામાં આવ્યો હતો.
📊 ‘ઓપરેશન મ્યૂલ હન્ટ ૧.૦’ ની મોટી સિદ્ધિઓ:
- ૬૩૮ સાયબર ગુનેગારોની ધરપકડ: રાજ્યભરમાં કુલ ૫૬૫ FIR નોંધીને ગુનેગારોને જેલભેગા કરાયા.
- ૯૧૩ શંકાસ્પદ મ્યૂલ અકાઉન્ટ ફ્રીઝ: ગેરકાયદે નાણાકીય હેરફેર માટે ભાડે રાખેલા ખાતાઓ સામે કડક એક્શન.
- ચેક ફ્રોડમાં ૭૫% નો ઘટાડો: બેંકોમાંથી ચેક દ્વારા થતા શંકાસ્પદ ઉપાડમાં ભારે ઘટાડો નોંધાયો.
- ATM છેતરપિંડીમાં ૬૬% નો ઘટાડો: એટીએમ મશીનો દ્વારા થતા ગેરકાયદેસર ઉપાડ પર લગામ લગાવાઈ.
🤖 હવે AI રોકશે સાયબર ફ્રોડ: ભવિષ્યનું પ્લાનિંગ
આગામી સમયમાં આ લડાઈને વધુ ટેકનોલોજી સભર અને મજબૂત બનાવવામાં આવી રહી છે. આરબીઆઈ (RBI) ના માર્ગદર્શન હેઠળ Indian Digital Payment Intelligence Corporation (IDPIC) ની રચના થઈ રહી છે. જેના હેઠળ:
૧. AI આધારિત રિસ્ક સ્કોરિંગ સિસ્ટમ કાર્યરત કરાશે, જે શંકાસ્પદ ઓનલાઈન વ્યવહારોને આપમેળે ઓળખશે.
૨. mulehunter.ai రજિસ્ટ્રી શરૂ કરવામાં આવી રહી છે, જે શંકાસ્પદ ટ્રાન્ઝેક્શન્સને તાત્કાલિક બ્લોક કરી દેશે.
ગુજરાત પોલીસના જણાવ્યા અનુસાર, સાયબર સુરક્ષા એ હવે માત્ર આર્થિક બાબત નથી પણ દેશની રાષ્ટ્રીય સુરક્ષાનો વિષય છે. પોલીસ સાયબર ગુનેગારોના મૂળ સુધી પહોંચીને આકરી સજા અપાવવા સજ્જ છે. ડિજિટલ યુગમાં નાગરિકોને પણ સતર્ક, જાગૃત અને સુરક્ષિત રહેવા અપીલ કરવામાં આવી છે.
