નવી દિલ્હી
દેશભરમાં મોબાઈલ યુઝર્સ માટે સૌથી મોટી માથાના દુખાવા સમાન ધીમી ઈન્ટરનેટ સ્પીડ અને અવારનવાર થતા કૉલડ્રોપની સમસ્યા હવે નજીકના ભવિષ્યમાં ભૂતકાળ બની જશે. ભારતના ૧૩૦ કરોડથી વધુ મોબાઈલ ગ્રાહકો માટે હવે અદ્યતન ડિજિટલ નેટવર્ક ઈન્ફ્રાસ્ટ્રક્ચર તૈયાર કરવામાં આવી રહ્યું છે. આ નવીનતમ વ્યવસ્થા હેઠળ સામાન્ય મોબાઈલ ટાવર્સને ‘AI મગજ’ ધરાવતા સ્માર્ટ ટાવર્સમાં રૂપાંતરિત કરવામાં આવશે, જે માનવીય હસ્તક્ષેપ વગર પોતાની જાતે જ નેટવર્ક લોડનું વિશ્લેષણ કરીને સિસ્ટમને રિયલ-ટાઇમમાં અપગ્રેડ કરી શકશે.
ઓટો મોડ પર થશે નેટવર્કનું ઓટોમેટિક અપગ્રેડેશન
આ નવી ટેકનોલોજી ‘સ્કેલ વિધાઉટ બાઉન્ડ્રીઝ’ (Scale Without Boundaries) મોડેલ પર કામ કરશે. જેમાં જમીનની અંદર રહેલા ઑપ્ટિકલ ફાઈબર નેટવર્કથી લઈને અંતરિક્ષમાં રહેલા ઉપગ્રહ (સેટેલાઇટ), ક્લાઉડ કમ્પ્યુટિંગ, ડિજિટલ ઉપકરણો અને આર્ટિફિશિયલ ઇન્ટેલિજન્સ એકબીજા સાથે એકીકૃત (ઈન્ટિગ્રેટેડ) થઈને કામ કરશે. ટાવરમાં લાગેલી AI સિસ્ટમ આપમેળે નક્કી કરી લેશે કે કયા વિસ્તારમાં ટ્રાફિકનું ભારણ અતિશય વધ્યું છે, કયા સેક્ટરમાં બેન્ડવિડ્થ વધારવાની તાતી જરૂરિયાત છે અને કયા સ્થળે ટેકનિકલ ખામી સર્જાવાની શક્યતા છે. કોઈપણ ખામી સર્જાય તે પૂર્વે જ સિસ્ટમ ઓટો મોડ પર તેને સુધારી લેશે.
6G ટેકનોલોજી માટેનું મુખ્ય માળખું બનશે AI
આગામી સમયમાં શરૂ થનારા 6-જી નેટવર્ક માટે સમગ્ર ટેલિકોમ માળખાને મોટા પાયે અપડેટ કરવામાં આવી રહ્યું છે. આ નેક્સ્ટ-જનરેશન નેટવર્કમાં 5G, 6G, ઑપ્ટિકલ ફાઈબર, એજ કમ્પ્યુટિંગ અને ઇન્ટેલિજન્ટ રેડિયો એક્સેસ નેટવર્ક (Open RAN) સીધા AI સાથે જોડાયેલા રહેશે.
સ્માર્ટ મોબાઈલ ટાવર્સ ઓટો-કનેક્ટેડ મોડ પર રહેવાથી જે-તે ક્ષેત્રમાં ભીડભાડ કે તહેવારો દરમિયાન જ્યારે નેટવર્ક જામ થવાની સ્થિતિ ઊભી થાય, ત્યારે આપોઆપ નજીકના અન્ય ટાવર્સ સાથે ફ્રિક્વન્સી બેલેન્સ કરીને યુઝર્સને અવિરત અને હાઈ-સ્પીડ કનેક્ટિવિટી આપવાનું ચાલુ રાખશે. આ ક્રાંતિકારી ફેરફારથી દેશમાં ડિજિટલ કનેક્ટિવિટી વધુ મજબૂત અને ત્રુટિરહિત બનશે.
