માર્કેટમાં વ્યાજ દર ઇફેક્ટ: સેન્સેક્સ ૭૨,૫૫૫ ના સ્તરે ખાબક્યો, ડૉલર સામે રૂપિયો ૯૬.૭૬ ની સપાટીએ ગગડ્યો

જાહેરાત

રાજકોટ

રિઝર્વ બેંક ઓફ ઈન્ડિયા (RBI) દ્વારા સાડા ત્રણ વર્ષના લાંબા અંતરાલ બાદ રેપો રેટમાં ૦.૨૫ ટકાનો વધારો ઝીંકી દેવામાં આવતાં જ તેની સીધી નકારાત્મક અસર દેશના નાણાકીય બજારો પર જોવા મળી છે. ઊંચા વ્યાજદરના કારણે લોનધારકો પર EMI નો બોજ વધવા તેમજ આર્થિક ગતિ ધીમી પડવાની આશંકા વચ્ચે આજે ભારતીય શેરબજાર, બુલિયન માર્કેટ અને કરન્સી માર્કેટમાં એકસાથે કડાકો બોલી ગયો હતો.

શેરબજારમાં ૫૦૦થી વધુ પોઈન્ટનું ગાબડું

આજે કારોબારની શરૂઆતથી જ બજારમાં મંદીનો માહોલ છવાયેલો હતો. આરબીઆઈની ક્રેડિટ પોલિસીમાં વ્યાજદર વધવાની પૂરી શક્યતા હોવાથી રોકાણકારોનું માનસ પહેલેથી જ સાવચેતીભર્યું હતું. પોલિસી જાહેર થતાં જ વેચવાલીનું દબાણ વધ્યું હતું:

• સેન્સેક્સ: ૫૧૨ પોઈન્ટના ઘટાડા સાથે ૭૨,૫૫૫ ના સ્તરે બંધ રહ્યો હતો (ઇન્ટ્રાડે હાઈ ૭૩,૦૧૮ અને લો ૭૨,૪૮૮).
• નિફ્ટી: ૧૯૯ પોઈન્ટ ઘટીને ૨૨,૫૭૬ ના સ્તરે પહોંચ્યો હતો (ઇન્ટ્રાડે હાઈ ૨૨,૭૧૭ અને લો ૨૨,૫૫૨).

આજના ઘટાડા વચ્ચે પણ કલ્યાણ જ્વેલર્સ, જ્યુબિલન્ટ, એસ્ટ્રલ, પેટીએમ, બીએસઈ, ભારતી એરટેલ, આઈસીઆઈસીઆઈ બેંક, કોટક બેંક અને લીલા પેલેસ જેવા શેરો સુધારા સાથે ટ્રેડ થતા જોવા મળ્યા હતા. જ્યારે નેલ્કો, ટ્યુબ ઇન્વેસ્ટમેન્ટ, ટાઇટન, ઇન્ડસઇન્ડ બેંક, એચડીએફસી બેંક, વોડાફોન, યસ બેંક, સુઝલોન, ચંબલ ફર્ટિલાઇઝર અને ટાટા કેપિટલ સહિતના શેરોમાં મોટો કડાકો નોંધાયો હતો.

રૂપિયો ગગડીને ૯૬.૭૬ થયો, આયાત વધુ મોંઘી બનશે

કરન્સી માર્કેટમાં પણ ભારે અફડાતફડી જોવા મળી હતી. યુએસ ડૉલર સામે ભારતીય રૂપિયો ૩૧ થી ૩૮ પૈસા જેટલો તૂટીને ૯૬.૭૬ થી ૯૬.૮૧ ના સ્તરે પહોંચી ગયો હતો. રૂપિયો નબળો પડવાથી ક્રૂડ ઓઈલ તેમજ ઈલેક્ટ્રોનિક્સ સાધનોની આયાત વધુ મોંઘી બનશે, જેના કારણે સ્થાનિક સ્તરે મોંઘવારી પર વધુ દબાણ સર્જાઈ શકે છે.

ક્રૂડ તેલમાં તેજી, સોના-ચાંદીમાં પીછેહઠ

મધ્ય પૂર્વમાં ચાલી રહેલા યુદ્ધ અને ભૂ-રાજકીય તણાવના કારણે આંતરરાષ્ટ્રીય સ્તરે ક્રૂડ ઓઈલના ભાવ સતત ભડકે બળી રહ્યા છે. ડબલ્યુટીઆઈ (WTI) ક્રૂડ ૮૯.૪૯ ડૉલર અને બ્રેન્ટ ક્રૂડ ૧૦૧.૦૯ ડૉલર પ્રતિ બેરલ બોલાઈ રહ્યું છે. ક્રૂડના વધતા ભાવ વચ્ચે સેફ હેવન ગણાતા સોના-ચાંદીમાં આજે નફારૂપી વેચવાલી જોવા મળી હતી:

• વૈશ્વિક બજારમાં સોનું ૪,૧૨૭ ડૉલર પ્રતિ ઔંસ રહ્યું હતું.
• સ્થાનિક વાયદા બજારમાં સોનું ₹૪૯૦ ઘટીને ₹૧,૪૯,૬૩૦ અને હાજર સોનું ₹૧,૫૨,૫૦૦ ના સ્તરે નોંધાયું હતું.
• ચાંદી હાજરમાં ₹૨,૨૮,૦૦૦ પ્રતિ કિલો અને વાયદામાં ₹૧,૮૦૦ તૂટીને નોંધાઈ હતી.

જાહેરાત