નવી દિલ્હી :
ગત ૩૦ સપ્ટેમ્બરના રોજ ફ્લાય દુબઈની દુબઈથી ઈઝરાયેલ જઈ રહેલી ફ્લાઇટમાં મધદરિયે હવામાં બનેલી સનસનાટીભરી ઘટના બાદ સમગ્ર વિશ્વ સહિત ભારતીય નાગરિક ઉડ્ડયન ક્ષેત્રમાં ભારે ચકચાર મચી ગઈ છે. ફ્લાઇટ દરમિયાન ઓમાનના સહ-પાયલોટ હમામ અલ હમામીએ કોકપીટમાં હાજર ભારતીય મૂળના સિનિયર કેપ્ટન સ્મિત મચ્છર પર ઈમરજન્સી સ્થિતિ માટે રખાતી કુહાડી (Crash Axe) વડે જીવલેણ હુમલો કર્યો હતો. આ ઘટના બાદ ભારતીય સુરક્ષા એજન્સીઓ અને એવિએશન મંત્રાલયે પણ દેશના એરપોર્ટ્સ અને આંતરરાષ્ટ્રીય ફ્લાઇટ્સની સુરક્ષા વ્યવસ્થાને લઈને ગંભીર આંતરિક સમીક્ષા હાથ ધરી છે.
વિદેશી એરલાઇન્સના ક્રૂ મેમ્બર્સની પૃષ્ઠભૂમિની તપાસ થશે
સૂત્રોના જણાવ્યા અનુસાર, ભારતમાં લેન્ડ થતી અને અહીંથી ઓપરેટ કરતી તમામ વિદેશી એરલાઇન્સના પાયલોટ, એર હોસ્ટેસ અને સમગ્ર ફ્લાઇટ ક્રૂની પ્રોફાઇલ તથા બેકગ્રાઉન્ડની ઊંડાણપૂર્વક ચકાસણી કરવા પર વિચારણા ચાલી રહી છે. ખાસ કરીને ભારતીય એરપોર્ટ્સ પર આવતી-જતી આંતરરાષ્ટ્રીય ફ્લાઇટ્સના કોકપીટ કે કેબિન ક્રૂમાં અન્ય કયા દેશોના નાગરિકો (ખાસ કરીને પાકિસ્તાન સહિતના સંવેદનશીલ દેશોના નાગરિકો) કાર્યરત છે, તેની સંપૂર્ણ માહિતી અને ડેટાબેઝ રાખવા અંગે સુરક્ષા એજન્સીઓ ચોક્કસ પ્રોટોકોલ તૈયાર કરી રહી છે.
આરોપી સહ-પાયલોટનું કથિત આતંકી કનેક્શન
તપાસ દરમિયાન એવી ચોંકાવનારી વિગતો સામે આવી રહી છે કે હુમલો કરનાર સહ-પાયલોટ હમામ આતંકવાદી સંગઠન અલ-કાયદાની વિચારધારાથી પ્રભાવિત હોવાની આશંકા છે. ઈઝરાયેલ સહિત અન્ય દેશોની તપાસ એજન્સીઓ હાલ એ દિશામાં સઘન તપાસ કરી રહી છે કે શું આ કોઈ એકલી વ્યક્તિનું વ્યક્તિગત ગાંડપણ હતું કે પછી વિમાનને હવામાં જ હાઈજેક કે ક્રેશ કરવાનું કોઈ આંતરરાષ્ટ્રીય આતંકી કાવતરું હતું. આ ઘટનાએ એવિએશન સેક્ટરમાં સાબિત કર્યું છે કે માત્ર મુસાફરો જ નહીં, પરંતુ કોકપીટ સુધી સીધી પહોંચ ધરાવતા સ્ટાફની સુરક્ષા ક્લિયરન્સ પણ એટલી જ અનિવાર્ય છે.
કોકપીટમાં કુહાડી રાખવાના નિયમો પર પુનઃવિચારણા
હવાઈ મુસાફરીના વૈશ્વિક નિયમો મુજબ, ફ્લાઇટ દરમિયાન અકસ્માત કે ઈમરજન્સી સમયે કેબિન પેનલ તોડવા માટે કોકપીટમાં એક ખાસ કુહાડી રાખવામાં આવતી હોય છે. પરંતુ આ ઘટનામાં સુરક્ષા માટે રાખવામાં આવેલું સાધન જ હથિયાર બની જતાં આંતરરાષ્ટ્રીય સ્તરે સવાલો ઉભા થયા છે. ભવિષ્યમાં તેને કોકપીટમાંથી હટાવવી કે તેના ઉપયોગ માટે કોઈ નવો સુરક્ષા પ્રોટોકોલ નક્કી કરવો, તે અંગે ઇન્ટરનેશનલ સિવિલ એવિએશન ઓર્ગેનાઇઝેશન (ICAO) ની નવી ગાઇડલાઇન્સ જાહેર થયા બાદ ભારત તેનો અમલ કરશે.
