નવી દિલ્હી
ગુજરાતના મુખ્યમંત્રી પદથી લઈને દેશના વડાપ્રધાન તરીકે શાસન અને જનસેવાના ૨૫ વર્ષ પૂર્ણ થવાના ઐતિહાસિક અવસરે વડાપ્રધાન નરેન્દ્ર મોદીએ નવી દિલ્હી સ્થિત ઇન્દિરા ગાંધી ઇન્ડોર સ્ટેડિયમ ખાતે આયોજિત ભવ્ય સમારોહમાં દેશભરની યુવા પેઢી અને નાગરિકોને ભાવુક તથા પ્રેરણાદાયી સંબોધન કર્યું હતું. વડાપ્રધાને સ્પષ્ટ શબ્દોમાં જણાવ્યું હતું કે, “જો મને ચૂંટણીના રાજકારણમાં ચમકવાની અંગત ઇચ્છા હોત તો હું બહુ વહેલો ચૂંટણી મેદાનમાં આવી ગયો હોત, પરંતુ તે મારો ક્યારેય મિજાજ રહ્યો નથી. હું જીવનમાં શું બનીશ કે મારું શું થશે તે મેં કદી વિચાર્યું નહોતું; હું કોઈ અંગત મહત્વકાંક્ષા માટે નહીં પરંતુ રાષ્ટ્રનિર્માણના મિશન માટે જીવનારો વ્યક્તિ છું.”
‘મારા પર દેશના પ્રત્યેક નાગરિકનો સૌથી મોટો અધિકાર’
પોતાના કાર્યકાળની રજત જયંતી પર કૃતજ્ઞતા વ્યક્ત કરતાં શ્રી મોદીએ કહ્યું કે, “મુખ્યમંત્રીથી માંડીને વડાપ્રધાન સુધીના આ ૨૫ વર્ષ દરમિયાન અનેક ચૂંટણીઓ આવી અને દેશની જનતાએ મને હંમેશાં સેવા માટે આશીર્વાદ આપીને પસંદ કર્યો છે. આજે હું જે કંઈ પણ છું અને જે સ્થાને પહોંચ્યો છું, તેમાં સૌથી મોટું યોગદાન દેશવાસીઓનું છે. તેથી મારા પર દેશના પ્રત્યેક નાગરિકનો સૌથી મોટો હક છે. આ ૨૫ વર્ષ એ જનતાનો અતૂટ વિશ્વાસ અને મારા માટે જીવનભરના અનુભવોની અણમોલ મૂડી છે.”
૫૦ વર્ષ સુધી સંગઠન અને આદિવાસી-પહાડી ક્ષેત્રોમાં સેવાનો રેકોર્ડ
સરકારના વડા તરીકેના પોતાના દીર્ઘકાલીન કાર્યકાળ અંગે વાત કરતાં વડાપ્રધાને ઉમેર્યું હતું કે, “હું કોઈપણ પ્રકારની આત્મપ્રશંસામાં માનતો નથી. ૨૫ વર્ષ પહેલાં ૫૦ વર્ષની ઉંમર સુધી મેં જંગલોમાં વનબંધુ-આદિવાસીઓની સેવા કરી અને હિમાલયના પહાડોમાં જીવન વિતાવ્યું હતું. પક્ષના સંગઠનમાં પાયાના કાર્યકર તરીકે મેં અનેક લોકોને ચૂંટણીઓ લડાવી અને જીતાડી હતી, પરંતુ પોતે ક્યારેય ચૂંટણી લડી નહોતી. અચાનક ૨૦૦૧માં ગુજરાતની સેવાની જવાબદારી આવી અને ત્યાંથી જનસેવાનો નવો અધ્યાય શરૂ થયો હતો.”
‘વી વિલ ડૂ ઇટ’ (We Will Do It) નો નારો અને ભવિષ્યના સંકલ્પો
આજના ડિજિટલ યુગના યુવાનો (Gen-Z) સાથે સીધો સંવાદ સાધતાં વડાપ્રધાને વર્ષ ૨૦૪૭ સુધીમાં ભારતને સંપૂર્ણ વિકસિત રાષ્ટ્ર બનાવવાનો આહ્વાન આપ્યું હતું. આ માટે તેમણે ‘વી વિલ ડૂ ઇટ’નો નવો નારો આપી દેશવાસીઓમાં નવો જોશ ફૂંક્યો હતો. તેમણે વિશ્વાસ વ્યક્ત કર્યો હતો કે:
- ભારત ટૂંક સમયમાં વિશ્વની ટોચની ત્રણ સૌથી મોટી અર્થવ્યવસ્થાઓમાં સામેલ થશે.
- એક દિવસ ભારત પોતાનું સ્થાનિક ‘મેઇડ ઇન ઇન્ડિયા’ પેસેન્જર વિમાન પણ આકાશમાં ઉડતું જોશે.
- દેશની સેના અને સુરક્ષા ક્ષમતાનો ઉલ્લેખ કરતાં તેમણે સર્જિકલ સ્ટ્રાઈક અને આતંકવાદ વિરોધી આકરા ઓપરેશન્સની યાદ અપાવી જણાવ્યું કે ભારતે દુશ્મનોના ઘરમાં ઘૂસીને આકાઓને પાઠ ભણાવ્યો છે.
- દેશમાં ભવિષ્યમાં ઓલિમ્પિક ગેમ્સનું ભવ્ય આયોજન કરવું એ ભારતનો અડગ સંકલ્પ છે.
સમગ્ર દેશમાં જીવંત પ્રસારિત થયેલા આ કાર્યક્રમમાં હજારો યુવાનો, કેન્દ્રીય મંત્રીઓ અને વિવિધ ક્ષેત્રના અગ્રણીઓ ઉપસ્થિત રહ્યા હતા.
