નવી દિલ્હી:
દેશની રાજધાની દિલ્હીમાં મહિલા સુરક્ષાના દાવાઓ વચ્ચે વધુ એક હૃદયદ્રાવક અને ચકચારી ગેંગરેપની ઘટના સામે આવી છે. દક્ષિણ-પૂર્વ દિલ્હીના પ્રસિદ્ધ કાલકાજી મંદિર નજીક આવેલા આસ્થા કુંજ પાર્કમાં ૧૭ વર્ષની સગીરા પર પોતાને નકલી પોલીસ ગણાવીને આવેલા ત્રણ નરાધમોએ સામૂહિક દુષ્કર્મ આચર્યું હતું. આ સનસનાટીભર્યા કેસમાં દિલ્હી પોલીસે ગણતરીના કલાકોમાં આક્રમક કાર્યવાહી કરતાં અમર કોલોની વિસ્તારમાં એન્કાઉન્ટર બાદ એક મુખ્ય આરોપીને ઝડપી પાડ્યો છે, જ્યારે અન્ય બે ફરાર આરોપીઓની ધરપકડ માટે મોટા પાયે દરોડા પાડવામાં આવી રહ્યા છે.
કાલકાજી મંદિરે દર્શન કરી પાર્કમાં બેઠા હતા અને બની દુર્ઘટના
પોલીસ અહેવાલ અનુસાર, સાંજે આશરે ૭:૦૦ વાગ્યાના સુમારે ૧૭ વર્ષની પીડિતા પોતાના એક સગીર મિત્ર સાથે કાલકાજી મંદિરે દર્શન કરવા ગઈ હતી. દર્શન પૂર્ણ કર્યા બાદ બંને આશરે ૭:૩૦ વાગ્યે મંદિર નજીક આવેલા આસ્થા કુંજ પાર્કમાં બેસીને વાતચીત કરી રહ્યા હતા. તે દરમિયાન અંદાજે ૨૫ થી ૩૦ વર્ષની વયના ત્રણ અજાણ્યા યુવકો ત્યાં ધસી આવ્યા હતા. તેમણે પોતાને દિલ્હી પોલીસના જવાનો ગણાવીને બંને કિશોરો પર રોફ જમાવવાનું અને કાયદાકીય કાર્યવાહીનો ડર બતાવી ધમકાવવાનું શરૂ કર્યું હતું.
મિત્રને બંધક બનાવી સગીરા પર સામૂહિક અત્યાચાર ગુજાર્યો
ધમકી આપ્યા બાદ આરોપીઓ પૈકી એક શખ્સે સગીર છોકરાને પકડી રાખી બંધક બનાવી લીધો હતો અને તેને કોઈ પણ પ્રકારનો પ્રતિકાર ન કરવા દીધો. ત્યારબાદ ત્રણેય નરાધમોએ ૧૭ વર્ષની નિર્દોષ સગીરા પર વારાફરતી સામૂહિક દુષ્કર્મ ગુજાર્યું હતું. આ ઘૃણાસ્પદ કૃત્ય આચર્યા બાદ ત્રણેય આરોપીઓ અંધારાનો લાભ લઈને સ્થળ પરથી નાસી છૂટ્યા હતા. ઘટના બાદ રાત્રે પોણા નવ વાગ્યે પોલીસ કંટ્રોલ રૂમ (PCR) ને જાણ કરવામાં આવતાં દિલ્હી પોલીસનો મોટો કાફલો તાત્કાલિક પાર્ક ખાતે દોડી આવ્યો હતો અને ગંભીર હાલતમાં પીડિતાને મેડિકલ તપાસ તથા સારવાર માટે તાબડતોબ હોસ્પિટલ ખસેડવામાં આવી હતી.
પોલીસે પોક્સો હેઠળ ગુનો નોંધી સર્વેલન્સ ગોઠવ્યું
આ ગંભીર ગુનાની ગંભીરતા જોતાં દક્ષિણ-પૂર્વ દિલ્હી પોલીસે તાત્કાલિક પોક્સો (POCSO) એક્ટ તેમજ બળાત્કાર સંબંધિત આકરી કલમો હેઠળ એફઆઈઆર (FIR) નોંધી તપાસના ચક્રો ગતિમાન કર્યા હતા. ઘટનાસ્થળ અને તેની આસપાસના તમામ સીસીટીવી કેમેરાના ફૂટેજ તેમજ ટેકનિકલ સર્વેલન્સ અને મોબાઈલ લોકેશનના આધારે પોલીસે આરોપીઓની કડી મેળવી હતી.
અમર કોલોનીમાં એન્કાઉન્ટર: ઓખલા મંડીનો આસિફ ઝડપાયો
પોલીસ ટીમોએ પગેરું દબાવતાં આરોપીઓ અમર કોલોની વિસ્તારમાં છુપાયા હોવાની બાતમી મળી હતી. પોલીસે વિસ્તારને ઘેરી લેતાં આરોપીઓ સાથે સામસામે અથડામણ થઈ હતી. આ એન્કાઉન્ટર દરમિયાન ઓખલા મંડીમાં કામ કરતો આસિફ નામનો એક આરોપી પોલીસના હાથે ઝડપાઈ ગયો હતો. દિલ્હી પોલીસે જણાવ્યું છે કે ફરાર થયેલા બાકીના બે નરાધમોની ચોક્કસ ઓળખ થઈ ચૂકી છે અને તેમને ઝડપી પાડવા માટે વિશેષ ક્રાઈમ ટીમો દ્વારા વિવિધ સ્થળોએ દરોડા પાડવામાં આવી રહ્યા છે.
