મોરબી: મોરબી મહાનગરપાલિકામાં જન્મ અને મરણના દાખલા મેળવવા માટે નાગરિકોની વધતી ભીડ વચ્ચે હવે તંત્ર દ્વારા વ્યવસ્થા સુધારવા માટે સકારાત્મક પ્રયાસો શરૂ કરવામાં આવ્યા છે. દૈનિક મોટી સંખ્યામાં લોકો સેવા માટે પહોંચતા હોવા છતાં, કામગીરી વધુ ઝડપી અને પારદર્શક બને તે માટે અધિકારીઓ કાર્યરત થયા છે.તંત્ર દ્વારા ઓનલાઈન પ્રક્રિયાને મજબૂત બનાવવાના પ્રયાસો સાથે કાઉન્ટર પર સેવા ક્ષમતા વધારવાની દિશામાં પણ વિચારણા ચાલી રહી છે. ખાસ કરીને Digital Gujarat પોર્ટલને વધુ અસરકારક રીતે અમલમાં લાવવા માટે ટેકનિકલ સુધારા હાથ ધરવામાં આવી રહ્યા છે, જેથી નાગરિકોને ઘર બેઠા સરળતાથી દાખલા મળી શકે.
સ્થાનિક સ્તરે વધુ સ્ટાફ નિયુક્તિ, ટોકન સિસ્ટમ અને માર્ગદર્શન કાઉન્ટર જેવી સુવિધાઓ ઉમેરવાની યોજના પર કામ શરૂ થયું હોવાનું જાણવા મળે છે. આ પગલાં અમલમાં આવતા નાગરિકોને લાંબી લાઈનોમાંથી રાહત મળશે અને સેવા પ્રદાનમાં ઝડપ આવશે.
નાગરિકો માં પણ હવે આશા જાગી છે કે તંત્રના આ સકારાત્મક અભિગમથી આવનારા સમયમાં સેવા વધુ સરળ, ઝડપી અને પારદર્શક બનશે.
