વાંકાનેર :
નવરાત્રીના પાવન પર્વ નિમિત્તે સૌરાષ્ટ્રભરમાંથી હજારો શ્રદ્ધાળુઓ પાલનપીર તેમજ કચ્છ સ્થિત આશાપુરા માતાના મઢ ખાતે દર્શનાર્થે પગપાળા જઈ રહ્યા છે. એક તરફ પ્રશાસન અને પોલીસ દ્વારા પદયાત્રીઓની સલામતી માટે રેડિયમ પટ્ટીઓ અને સેવા કેમ્પોનું માર્ગદર્શન આપવામાં આવી રહ્યું છે, ત્યારે બીજી તરફ વાંકાનેર પંથકના ગ્રામીણ માર્ગોની બિસ્માર હાલતે વિકાસના તમામ દાવાઓની પોલ ખોલી નાખી છે. વાંકાનેર તાલુકાના રાતીદેવડી-કોઠારીયા વિસ્તાર તરફ જતા માર્ગો અત્યંત જર્જરિત હાલતમાં ફેરવાઈ જતાં પદયાત્રીઓ અને વાહનચાલકો ભારે મુશ્કેલીનો સામનો કરી રહ્યા છે.
સ્થળ પરની તસવીરો સાથે ફારૂકભાઈ કડીવારે તંત્રને ઘેર્યું
વાંકાનેર તાલુકા પંચાયતના કોંગ્રેસ પક્ષના સદસ્ય ફારૂકભાઈ કડીવારે માર્ગ પર પડેલા મસમોટા ખાડાઓની સ્થળ પરની તસવીરો મીડિયા સમક્ષ રજૂ કરી તંત્રની લાપરવાહી સામે આક્રોશ વ્યક્ત કર્યો છે. તેમણે જણાવ્યું હતું કે, રોડ પર ઠેર-ઠેર ડામર ઉખડી ગયો છે અને જીવલેણ ખાડાઓ પડી ગયા છે. આ માર્ગ પરથી માત્ર શ્રદ્ધાળુઓ જ નહીં, પરંતુ સ્થાનિક ખેડૂતો અને રોજિંદા વાહનચાલકો પણ પસાર થાય છે, જેમના વાહનોને મોટું નુકસાન થઈ રહ્યું છે.
રાત્રિના સમયે અકસ્માતનો ગંભીર ખતરો
ફારૂકભાઈ કડીવારે સંબંધિત માર્ગ અને મકાન વિભાગના ઉચ્ચ અધિકારીઓને ટેલિફોનિક રજૂઆત કરીને માર્ગોનું તાત્કાલિક પેચવર્ક કરવા માંગ કરી છે. નવરાત્રી દરમિયાન ગરમીથી બચવા માટે મોટાભાગના પદયાત્રીઓ રાત્રિના સમયે પ્રવાસ કરતા હોય છે. આવા સમયે અંધારામાં રસ્તા પરના ખાડા ન દેખાવાથી શ્રદ્ધાળુઓ પડી જવાના કે વાહનો સાથે અકસ્માત થવાની પૂરેપૂરી શક્યતા રહેલી છે.
તંત્ર યુદ્ધના ધોરણે મરામત કરશે કે નહીં?
એક તરફ વિકાસના ગુણગાન ગાવામાં આવે છે, ત્યારે ધાર્મિક યાત્રાના મુખ્ય માર્ગો કેમ ભગવાન ભરોસે છોડી દેવાયા તેવો સવાલ સ્થાનિક નાગરિકો અને શ્રદ્ધાળુઓ પૂછી રહ્યા છે. કોંગ્રેસે શાસક પક્ષ અને વહીવટી તંત્રને સવાલ કર્યો છે કે શું કોઈ મોટી દુર્ઘટના બને તે પહેલાં પદયાત્રીઓની સલામતી ખાતર આ રસ્તાઓનું તાબડતોબ સમારકામ કરવામાં આવશે? હવે તંત્ર સ્થળ તપાસ કરીને તાત્કાલિક ધોરણે ખાડા પૂરે છે કે કેમ તેના પર સૌની નજર ટકેલી છે.
