મોરબી: સ્થાનિક સ્વરાજ્યની ચૂંટણીમાં ભાજપનો ભગવો લહેરાયો, ‘શ્રી કમલમ્’ ખાતે વિજેતા પ્રતિનિધિઓનો ભવ્ય અભિવાદન સમારોહ યોજાયો
મોરબી, ૨૯ એપ્રિલ ૨૦૨૬:
મોરબી જિલ્લામાં તાજેતરમાં યોજાયેલી સ્થાનિક સ્વરાજ્યની ચૂંટણીમાં ભારતીય જનતા પાર્ટીએ મેળવેલી પ્રચંડ અને ઐતિહાસિક જીતનો જશ્ન આજે મોરબી જિલ્લા ભાજપ કાર્યાલય ‘શ્રી કમલમ્’ ખાતે મનાવવામાં આવ્યો હતો. આ અવસરે એક ભવ્ય અભિવાદન સમારોહનું આયોજન કરવામાં આવ્યું હતું, જેમાં મોટી સંખ્યામાં હોદ્દેદારો અને કાર્યકરો ઉમટી પડ્યા હતા.
જિલ્લા ભાજપ પ્રમુખના અધ્યક્ષ સ્થાને યોજાયેલા આ કાર્યક્રમમાં નવનિર્વાચિત પ્રતિનિધિઓનું ફૂલહાર અને ઉત્સાહભેર સન્માન કરવામાં આવ્યું હતું. કાર્યક્રમમાં મોરબી જિલ્લા પ્રભારી ગજેન્દ્રભાઇ સક્સેના, પ્રદેશ ભાજપ સહ-કોષાધ્યક્ષ મોહનભાઈ કુંડારીયા અને જિલ્લા ભાજપ મહામંત્રી નિર્મલભાઇ જારીયા સહિતના નેતાઓએ હાજરી આપી વિજેતા ઉમેદવારોને પ્રોત્સાહિત કર્યા હતા.
દિગ્ગજ નેતાઓએ કાર્યકરોની મહેનતને બિરદાવી
આ પ્રસંગે રાજ્યસભાના સાંસદ કેશરીસિંહ ઝાલા, સુરેન્દ્રનગરના સાંસદ ચંદુભાઈ સિહોરા, ટંકારા-પડધરીના ધારાસભ્ય દુર્લભજીભાઈ દેથરીયા, અને હળવદના ધારાસભ્ય પ્રકાશભાઈ વરમોરાએ પ્રાસંગિક ઉદબોધન આપ્યું હતું. પૂર્વ મંત્રી બ્રિજેશભાઈ મેરજા સહિતના આગેવાનોએ પણ વિજેતાઓને શુભેચ્છા પાઠવતા જણાવ્યું હતું કે, આ જીત કાર્યકરોની અથાણ મહેનત અને જનતાના વિશ્વાસનું પરિણામ છે.
‘છેવાડાના માનવી સુધી વિકાસ પહોંચાડવો એ જ લક્ષ્ય’
ઉપસ્થિત મહાનુભાવોએ ચૂંટાયેલા પ્રતિનિધિઓને સંબોધતા ટકોર કરી હતી કે, જનતાએ જે ભરોસો મૂક્યો છે તેને સાર્થક કરવાની જવાબદારી હવે આપણા શિરે છે. વિકાસના કાર્યોને વેગ આપી છેવાડાના માનવી સુધી સુવિધાઓ પહોંચાડવી એ આપણી પ્રાથમિકતા હોવી જોઈએ.
આ કાર્યક્રમમાં પૂર્વ ધારાસભ્ય પરસોત્તમભાઈ સાબરીયા, પૂર્વ પ્રમુખ રાઘવજીભાઈ ગડારા અને પૂર્વ મહામંત્રી નરેન્દ્રસિંહ ઝાલા સહિતના અનેક વરિષ્ઠ આગેવાનો હાજર રહ્યા હતા. ‘ભારત માતા કી જય’ના ગગનભેદી નારાઓ સાથે સમગ્ર વાતાવરણ વિજયમય બની ગયું હતું.
