મોરબી :
આજના આધુનિક યુગમાં પણ સમાજમાં કેટલીક જગ્યાએ દીકરા અને દીકરી વચ્ચે ભેદભાવ રાખવામાં આવે છે. પરંતુ મોરબીમાં બનેલી એક સંવેદનશીલ અને ભાવુક ઘટનાએ સમાજની આ જૂની માનસિકતા પર સચોટ પ્રહાર કર્યો છે. મોરબી જિલ્લા પંચાયતમાં ફરજ બજાવતા પૂજાબેન પંડ્યાના પિતાના અવસાન બાદ તેમની ત્રણેય દીકરીઓએ પિતાને કાંધ આપીને અંતિમ સંસ્કારની વિધિ પૂર્ણ કરી સમાજ સમક્ષ દીકરીના સ્થાનનું ઉત્તમ ઉદાહરણ પૂરું પાડ્યું છે.
પુત્રની ખોટ ન સાલવા દીધી: ૩ દીકરીઓએ નિભાવ્યો પુત્રધર્મ
મોરબીના નિવાસી સ્વ. નવીનચંદ્ર લાભશંકર પંડ્યાને કોઈ પુત્ર ન હતો. તેમના દુઃખદ અવસાન બાદ પરિવાર પર દુઃખનો પહાડ તૂટી પડ્યો હતો. આવી કઠિન પરિસ્થિતિમાં પુત્રની ગેરહાજરીને ખોટ ન બનવા દેતાં તેમની ત્રણેય દીકરીઓ—પૂજાબેન પંડ્યા, ધારાબેન પંડ્યા અને નેહાબેન પંડ્યાએ આગળ આવી પિતાની અંતિમ યાત્રામાં કાંધ આપી હતી. દીકરીઓને પોતાના પિતાને કાંધ આપતા જોઈને ઉપસ્થિત તમામ સ્વજનો અને સમાજજનોની આંખો અશ્રુભીની થઈ ગઈ હતી.
સમાજ સામે પ્રેરણાદાયી પ્રશ્ન: લિંગ મહત્વનું કે સંસ્કાર?
આ ઘટના માત્ર એક પરિવાર પૂરતી મર્યાદિત ન રહેતાં સમગ્ર ભારતીય સમાજ માટે વિચારવા જેવો પ્રસંગ બની ગઈ છે. પિતાના સંસ્કારોનું ઋણ અદા કરનારી આ દીકરીઓએ સાબિત કર્યું છે કે માતા-પિતાની સેવા, લાગણી અને અંતિમ ફરજ નિભાવવા માટે સંતાનનું લિંગ નહીં, પણ સંસ્કાર અને પ્રેમ મહત્વના છે. દીકરી માત્ર ‘પરાયું ધન’ કે ‘ઘરની લાડકી’ નથી, પરંતુ જરૂર પડે ત્યારે પરિવારની મજબૂત જવાબદારી ઉપાડતો આધારસ્તંભ પણ બની શકે છે.
દીકરી એ જ પૂર્ણ સંતાન
પૂજાબેન, ધારાબેન અને નેહાબેને પિતાને કાંધ આપીને એક પરિવારની વિદાયને સમાજ માટે એક ક્રાંતિકારી સંદેશમાં પરિવર્તિત કરી છે. આ પ્રસંગનો સૌથી મોટો સંદેશ એ જ છે કે દીકરીને ક્યારેય દીકરાની ખોટ તરીકે ન જોતાં, તેને સમાન હક, સન્માન અને જવાબદારી ધરાવતા પૂર્ણ સંતાન તરીકે સ્વીકારવાની જરૂર છે.
રિપોર્ટ: આરીફ દિવાન, મોરબી
