મુંબઈ :
ભારતમાં નીચા બેંક વ્યાજદરનો દોર ટૂંકાગાળા માટે હવે સમાપ્ત થયો હોય તેમ રિઝર્વ બેંક ઓફ ઈન્ડિયા (RBI) દ્વારા આજે નાણાકીય નીતિની સમીક્ષા બાદ રેપો રેટમાં ૦.૨૫ ટકાનો વધારો ઝીંકી દેવામાં આવ્યો છે. ફેબ્રુઆરી ૨૦૨૩ બાદ એટલે કે લાંબા સમયગાળા પછી પ્રથમ વખત રેપો રેટમાં આ વધારો કરવામાં આવ્યો છે. આગામી તહેવારોની મોસમ પૂર્વે જ લેવાયેલા આ કડક નિર્ણયના પરિણામે આવનારા દિવસોમાં સામાન્ય નાગરિકો માટે હોમ લોન, કાર લોન તેમજ પર્સનલ લોન સહિતના તમામ ધિરાણ મોંઘા થશે અને માસિક હપ્તા (EMI) માં સીધો વધારો નોંધાશે.
રેપો રેટ વધીને ૫.૫ ટકા થયો, વ્યાજદર ઘટવાની શક્યતા નહિવત્
આરબીઆઈની મોનેટરી પોલિસી કમિટી (MPC) ની ત્રણ દિવસીય દ્વિમાસિક બેઠકના અંતે ગવર્નર સંજય મલ્હોત્રા દ્વારા નીતિગત નિર્ણયોની સત્તાવાર જાહેરાત કરવામાં આવી હતી. આ સુધારા બાદ:
- મુખ્ય રેપો રેટ ૦.૨૫ ટકા વધીને હવે ૫.૫ ટકા થયો છે.
- માર્જિનલ સ્ટેન્ડિંગ ફેસિલિટી (MSF) અને બેંક રેટ વધીને ૫.૭૫ ટકા ના સ્તરે પહોંચ્યા છે.ગવર્નરે સ્પષ્ટ સંકેત આપ્યા હતા કે હાલની વૈશ્વિક પરિસ્થિતિ જોતાં નજીકના ભવિષ્યમાં વ્યાજદરમાં ઘટાડો થવાની કોઈ શક્યતા નથી.
વૈશ્વિક અનિશ્ચિતતા અને મોંઘવારી મોટો પડકાર
આ નિર્ણય અંગે સ્પષ્ટતા કરતાં આરબીઆઈ ગવર્નરે જણાવ્યું હતું કે, મધ્યપૂર્વમાં ચાલી રહેલા યુદ્ધ અને વૈશ્વિક ભૂ-રાજકીય તણાવના કારણે સર્જાયેલા સપ્લાય ચેઈન વિક્ષેપ તેમજ મોંઘવારીના દબાણને નિયંત્રિત કરવા માટે આ પગલું ભરવું અનિવાર્ય બન્યું હતું. આગામી ત્રણ ત્રિમાસિક ગાળા દરમિયાન દેશમાં સરેરાશ ફુગાવાનો દર ૫.૮ ટકા રહેવાનો અંદાજ મૂકવામાં આવ્યો છે. ભારતીય અર્થતંત્રના આંતરિક પાયા મજબૂત હોવા છતાં આંતરરાષ્ટ્રીય બજારોની નકારાત્મક અસરોથી બચવા માટે નાણાકીય નીતિને કડક બનાવવામાં આવી છે.
વિકાસ દર ૭.૧ ટકા રહેવાનો અંદાજ
રિઝર્વ બેંકે ચાલુ નાણાકીય વર્ષ માટે દેશનો વાર્ષિક આર્થિક વિકાસ દર (GDP Growth Rate) ૭.૧ ટકા રહેવાનું અનુમાન જાળવી રાખ્યું છે. ગવર્નરે ઉમેર્યું હતું કે દેશમાં ખાનગી વપરાશ અને ફિક્સ્ડ ઇન્વેસ્ટમેન્ટની સ્થિતિ મજબૂત છે. મેન્યુફેક્ચરિંગ અને સર્વિસ સેક્ટરનો પીએમઆઈ (PMI) પણ પ્રોત્સાહક સ્તરે રહ્યો છે. જોકે, પેસેન્જર ટ્રાફિક અને નોન-ડ્યુરેબલ સેક્ટરમાં થોડી નબળાઈ જોવા મળી છે. હવે પછી વ્યાજદરો સ્થિર રાખવા કે વધુ વધારવા તેનો આધાર ભવિષ્યમાં મોંઘવારી અને વૈશ્વિક સંજોગો કેવા રહે છે તેના પર રહેશે.
