મુંબઈ :
બોલિવૂડ સુપરસ્ટાર અજય દેવગણની મોસ્ટ અવેટેડ અને સૌથી સફળ સસ્પેન્સ-થ્રિલર ફ્રેન્ચાઇઝી ‘દ્રશ્યમ’ના ત્રીજા ભાગ ‘દ્રશ્યમ 3: ધ કન્ક્લુઝન’ને લઈને દર્શકોમાં જબરદસ્ત ક્રેઝ જોવા મળી રહ્યો છે. શુક્રવાર, 2 ઓક્ટોબરના રોજ સિનેમાઘરોમાં રિલીઝ થવા જઈ રહેલી આ ફિલ્મના એડવાન્સ બુકિંગે શરૂઆતથી જ બોક્સ ઓફિસ પર ધૂમ મચાવી દીધી છે. ટિકિટ વિન્ડો ખુલતાની સાથે જ ઝડપી વેચાણ જોવા મળ્યું છે, જે દર્શાવે છે કે ફિલ્મ પહેલા દિવસે રેકોર્ડબ્રેક ઓપનિંગ કરવા તરફ આગળ વધી રહી છે.
26.72 કરોડનું ગ્રોસ કલેક્શન અને 7.64 લાખ ટિકિટો વેચાઈ
ટ્રેડ અને બોક્સ ઓફિસ ડેટા અનુસાર, ‘દ્રશ્યમ 3’ એ એડવાન્સ બુકિંગમાં અત્યાર સુધીમાં અંદાજે ₹26.72 કરોડનું કુલ ગ્રોસ કલેક્શન કરી લીધું છે. બ્લોક કરેલી સીટો બાદ કરતાં પણ આ આંકડો ₹19.40 કરોડ જેટલો થાય છે. દેશભરમાં અત્યાર સુધીમાં 7.64 લાખથી પણ વધુ ટિકિટો વેચાઈ ચૂકી છે. કુલ 26,581 થી વધુ શોનું બુકિંગ થઈ ચૂક્યું છે, જેમાંથી ઘણા શો અત્યારથી જ હાઉસફુલ થઈ ગયા છે.
પ્રથમ દિવસે ₹40 કરોડથી વધુના કલેક્શનનો અંદાજ
ફક્ત રિલીઝના પહેલા દિવસ માટે જ ₹14.22 કરોડથી વધુનું એડવાન્સ બુકિંગ નોંધાઈ ચૂક્યું છે. ફિલ્મ 2 ઓક્ટોબર (ગાંધી જયંતી)ની રાષ્ટ્રીય રજાના દિવસે રિલીઝ થઈ રહી હોવાથી ટ્રેડ પંડિતોનું માનવું છે કે ફિલ્મ પહેલા જ દિવસે ભારતીય બોક્સ ઓફિસ પર ₹40 કરોડથી વધુનું નેટ કલેક્શન કરીને ઇતિહાસ રચી શકે છે. ખાસ કરીને સાંજ અને રાત્રિના શોમાં અત્યારથી 11% થી 13% જેટલી ઊંચી ઓક્યુપન્સી જોવા મળી રહી છે.
મહારાષ્ટ્ર, દિલ્હી અને ગુજરાતમાં જોરદાર ઉત્સાહ
રાજ્યવાર આંકડાઓ પર નજર કરીએ તો, મહારાષ્ટ્ર કુલ બુકિંગના આશરે 31% હિસ્સા સાથે ₹8.21 કરોડનું કલેક્શન કરીને મોખરે છે. જ્યારે દિલ્હી-NCRમાંથી ₹5.80 કરોડ અને ગુજરાતમાંથી ₹2.10 કરોડનું એડવાન્સ બુકિંગ થયું છે. શહેરોમાં મુંબઈ (₹4.76 કરોડ) અને પુણે (₹2.16 કરોડ) સૌથી આગળ છે. આ સમગ્ર એડવાન્સ બુકિંગ હિન્દી ભાષાના શોમાંથી નોંધાયું છે, જે વિજય સાલગાવકરની વાર્તાના અંતને જોવા માટે દર્શકોની આતુરતા સ્પષ્ટ કરે છે.
