રિપોર્ટ સંજય નંદેસરિયા, હળવદ:હળવદ પંથકમાં દેશના ૮૦મા સ્વાતંત્ર્ય પર્વની ઉજવણી ઉત્સાહ, ઉમંગ અને રાષ્ટ્રભક્તિના માહોલ વચ્ચે કરવામાં આવી હતી. શહેરથી લઈને ગ્રામ્ય વિસ્તારો સુધી વિવિધ સ્થળોએ ધ્વજવંદન અને ધ્વજારોહણના કાર્યક્રમો યોજાયા હતા. તિરંગાને સલામી સાથે દેશ માટે બલિદાન આપનાર શહીદો અને સ્વાતંત્ર્ય સેનાનીઓને શ્રદ્ધાંજલિ અર્પણ કરી નવી પેઢીમાં રાષ્ટ્રપ્રેમની ભાવના જગાવવામાં આવી હતી.હળવદ-મોરબી ચોકડી નજીક દૂધ મલિયા હનુમાનજી મંદિર સામે આવેલી વોરા સમાજની સોસાયટીમાં પણ 15મી ઓગસ્ટ નિમિત્તે ધ્વજવંદન કાર્યક્રમ યોજાયો હતો. સોસાયટીની સ્થાપનાથી છેલ્લા છ વર્ષથી 15મી ઓગસ્ટ અને 26મી જાન્યુઆરીના રાષ્ટ્રીય પર્વે નિયમિત ધ્વજવંદન કરવાની પરંપરા જળવાઈ રહી છે. આ વર્ષે પણ સોસાયટીના રહીશોએ રાષ્ટ્રધ્વજને સલામી આપી દેશભક્તિભર્યા વાતાવરણમાં સ્વાતંત્ર્ય પર્વની ઉજવણી કરી હતી. બીજી તરફ હળવદ તાલુકા કક્ષાના ૮૦મા સ્વાતંત્ર્ય પર્વની ઉજવણી ગોરી ઘનશ્યામપુર ગામે કરવામાં આવી હતી. હળવદના મામલતદાર એન. આર. રાઠોડના હસ્તે ધ્વજવંદન કરવામાં આવ્યું હતું. કાર્યક્રમમાં હળવદ પીઆઈ આર.ટી. વ્યાસ, તાલુકા પંચાયત પ્રમુખ શીતલબેન કણઝરીયા, ઉપપ્રમુખ રમેશભાઈ સહિત પદાધિકારીઓ, અધિકારીઓ, સરપંચ-ઉપસરપંચ, આગેવાનો, ગ્રામજનો અને વિદ્યાર્થીઓ ઉપસ્થિત રહ્યા હતા. રાષ્ટ્રગીતના ગુંજારવ અને દેશભક્તિના નારાઓ વચ્ચે યોજાયેલા આ કાર્યક્રમમાં વિવિધ ક્ષેત્રે ઉત્કૃષ્ટ કામગીરી કરનાર વ્યક્તિઓનું સન્માન કરવામાં આવ્યું હતું. શાળાના વિદ્યાર્થીઓએ દેશભક્તિ આધારિત સાંસ્કૃતિક કાર્યક્રમો રજૂ કરી ઉપસ્થિત સૌમાં રાષ્ટ્રપ્રેમની લાગણી જગાવી હતી. હળવદ શહેરમાં ઐતિહાસિક દરબાર નાકા ખાતે નગરપાલિકા દ્વારા સ્વાતંત્ર્ય પર્વની ગૌરવપૂર્ણ ઉજવણી કરવામાં આવી હતી.
નગરપાલિકા પ્રમુખ ફોરમબેન વિશાલભાઈ રાવલે રાષ્ટ્રધ્વજ ફરકાવી સલામી આપી હતી. આ પ્રસંગે શહીદો, સ્વાતંત્ર્ય સેનાનીઓ અને રાષ્ટ્રનાયકોને ભાવભીની શ્રદ્ધાંજલિ અર્પણ કરવામાં આવી હતી. પ્રમુખ ફોરમબેન રાવલે દેશની એકતા, અખંડિતતા અને વિકાસને વધુ મજબૂત બનાવવા દરેક નાગરિકે પોતાની ફરજ અને જવાબદારી નિષ્ઠાપૂર્વક નિભાવવાની હાકલ કરી હતી. કાર્યક્રમમાં નગરપાલિકાના પદાધિકારીઓ-સદસ્યો ઉપરાંત માર્કેટિંગ યાર્ડના ચેરમેન જયેશભાઈ પટેલ, વાઇસ ચેરમેન રમેશભાઈ, ભાજપ શહેર અધ્યક્ષ યશભાઈ પટેલ સહિત રાજકીય, સામાજિક અને વેપારી આગેવાનો તેમજ મોટી સંખ્યામાં નાગરિકો ઉપસ્થિત રહ્યા હતા.રાષ્ટ્રીય પર્વે એકતાનો સંદેશ હળવદ પંથકમાં યોજાયેલા આ વિવિધ કાર્યક્રમોની વિશેષતા એ રહી કે સ્વાતંત્ર્ય પર્વ માત્ર સરકારી કાર્યક્રમ પૂરતો સીમિત ન રહ્યો, પરંતુ સોસાયટી, શાળા, ગ્રામ્ય વિસ્તાર, નગરપાલિકા અને તાલુકા કક્ષાએ લોકોની સહભાગિતાથી લોકઉત્સવ બની રહ્યો છે. છેલ્લા છ વર્ષથી વોરા સમાજની સોસાયટીમાં જળવાતી ધ્વજવંદનની પરંપરા હોય કે ઘનશ્યામપુરમાં વિદ્યાર્થીઓની સાંસ્કૃતિક રજૂઆત — દરેક સ્થળે રાષ્ટ્રપ્રેમની ભાવનાને જીવંત રાખવાનો પ્રયાસ જોવા મળ્યો હતો. તિરંગાની છત્રછાયામાં યોજાયેલા કાર્યક્રમોએ નવી પેઢીને સ્વાતંત્ર્યનું મૂલ્ય, શહીદોના બલિદાન અને નાગરિક ફરજનો સંદેશ આપ્યો હતો. હળવદ પંથકમાં 15મી ઓગસ્ટની ઉજવણીનો આ માહોલ એ વાતની પ્રતીતિ કરાવતો રહ્યો કે દેશભક્તિ માત્ર એક દિવસની ઉજવણી નથી, પરંતુ દેશની એકતા, અખંડિતતા અને પ્રગતિ માટે સતત જવાબદારી નિભાવવાની ભાવના છે.
