વાંકાનેર, તા. 18 જુલાઈ: મોરબી જિલ્લા એલસીબી (પેટ્રોલ સ્કવોડ)એ વધુ એક સફળ કામગીરી હાથ ધરી વાંકાનેર સિટી પોલીસ સ્ટેશનમાં નોંધાયેલા ગુનામાં લાંબા સમયથી નાસતા ફરતા આરોપીને મહેસાણા જિલ્લાના કડી ખાતેથી ઝડપી પાડી કાયદાના હવાલે કર્યો છે.
પોલીસ મહાનિર્દેશક તથા પોલીસ અધિક્ષક મોરબીના માર્ગદર્શન હેઠળ નાસતા અને પેરોલ જમ્પ કરનાર આરોપીઓને પકડી પાડવા માટે જિલ્લાના વિવિધ વિસ્તારોમાં સઘન શોધખોળ હાથ ધરવામાં આવી રહી છે. તે દરમિયાન એલસીબીની પેટ્રોલ સ્કવોડને મળેલી ચોક્કસ બાતમીના આધારે મહેસાણા જિલ્લાના કડી ખાતે દરોડો પાડવામાં આવ્યો હતો.
દરોડા દરમિયાન વાંકાનેર સિટી પોલીસ સ્ટેશનમાં નોંધાયેલા ગુનામાં ફરાર આરોપી સંજય ઉર્ફે કલ્લા મુસ્તાકભાઈ ઉર્ફે રાજુભાઈ પટણી (રહે. દેવીપુર, તા. કડી, જિ. મહેસાણા)ને ઝડપી પાડી તેની પૂછપરછ કરવામાં આવી હતી. આરોપીએ ગુનામાં પોતાની સંડોવણી કબૂલી લેતાં કાયદેસરની કાર્યવાહી બાદ તેને વાંકાનેર સિટી પોલીસને સોંપવામાં આવ્યો છે. આ સફળ કામગીરી એલસીબી મોરબીના ઇન્ચાર્જ અધિકારીના માર્ગદર્શન હેઠળ PSI, ASI, હેડ કોન્સ્ટેબલ અને પોલીસ કોન્સ્ટેબલની ટીમે સંયુક્ત પ્રયાસોથી પાર પાડી હતી. ફરાર આરોપીઓને કાયદાના સકંજામાં લાવવા મોરબી જિલ્લા પોલીસ સતત સતર્ક અને સક્રિય છે, જેનાથી કાયદો અને વ્યવસ્થાની સ્થિતિ વધુ મજબૂત બનતી જોવા મળી રહી છે.
