મોરબી: હનુમાન જયંતીના પાવન અવસરે સમગ્ર મોરબી શહેર ‘જય શ્રી રામ’ અને ‘જય હનુમાન’ના નાદથી ગુંજી ઉઠ્યું હતું. શહેરના વિવિધ હનુમાન મંદિરોમાં વહેલી સવારથી જ ધાર્મિક કાર્યક્રમોની વણઝાર જોવા મળી હતી. ખાસ કરીને શક્તિ પ્લોટ વિસ્તારમાં આસ્થા અને ભક્તિનો ત્રિવેણી સંગમ સર્જાયો હતો.
શક્તિ પ્લોટમાં અનોખી ઉજવણી
શક્તિ પ્લોટ શેરી નંબર 4 માં આવેલ આસ્થાના પ્રતીક સમાન શ્રી શક્તિ હનુમાન મંદિર ખાતે ‘શ્રી શક્તિ પ્લોટ મિત્ર મંડળ’ દ્વારા ભવ્ય આયોજન કરવામાં આવ્યું હતું. આસપાસના એપાર્ટમેન્ટ વાસીઓના સહયોગથી આ મહોત્સવ ધામધૂમથી ઉજવાયો હતો. જેમાં બાળકો સાથે મળીને બેન્ડવાજાની રમઝટ વચ્ચે કેક કટિંગ કરવામાં આવ્યું હતું. આ તકે હનુમાન દાદાનું પૂજન-અર્ચન, ધૂન અને મહાપ્રસાદ સહિતના કાર્યક્રમો યોજાયા હતા.
શહેરના અન્ય મંદિરોમાં પણ ભક્તિભાવ
મોરબી શહેરના જાણીતા મંદિરોમાં પણ હનુમાન જયંતી નિમિત્તે હવન, પૂજન અને ભજનના કાર્યક્રમો યોજાયા હતા:
• મણિધર હનુમાન અને ચકીયા હનુમાન ખાતે શ્રદ્ધાળુઓની ભારે ભીડ જોવા મળી હતી.
• રોકડીયા હનુમાન અને કષ્ટભંજન હનુમાન મંદિરે વિશેષ શણગાર કરવામાં આવ્યો હતો.
• પંચમુખી હનુમાન અને અયોધ્યાપુરી મંદિર ખાતે સવારથી જ ધૂન-કીર્તનની રમઝટ જામી હતી.
• સંકટ મોચન હનુમાન (એસ.પી. રોડ) અને અંબિકા રોડ હનુમાન મંદિર ખાતે હવન, મહાપ્રસાદ અને બટુક ભોજનના સુંદર આયોજનો કરવામાં આવ્યા હતા.
સમગ્ર મોરબીમાં હનુમાન જયંતી નિમિત્તે ભક્તિમય માહોલ જોવા મળ્યો હતો અને શ્રદ્ધાળુઓએ દાદાના દર્શન કરી ધન્યતા અનુભવી હતી.
