મોરબી
વડાપ્રધાન નરેન્દ્ર મોદીના જાહેર જીવન અને શાસકીય નેતૃત્વના ૨૫ વર્ષ પૂર્ણ થવાના અવસરે રાજ્યભરમાં ‘વિકસિત ભારત સંકલ્પ સભા’ તેમજ ‘સેવા જ્યોતિ યાત્રા’ અંતર્ગત વિવિધ સ્થળોએ સભાઓ યોજાઈ રહી છે. આ ક્રમમાં મોરબી તાલુકાના સનાળા ખાતે પણ પક્ષના ચૂંટાયેલા જનપ્રતિનિધિઓ, પદાધિકારીઓ અને સ્થાનિક આગેવાનોની ઉપસ્થિતિમાં વિશેષ કાર્યક્રમ યોજાયો હતો. જોકે, મંચ પર અગ્રણી નેતાઓની ભરચક હાજરી સામે સભાખંડની બેઠક વ્યવસ્થામાં સામાન્ય નાગરિકો અને પક્ષીય કાર્યકરોની પાંખી હાજરી જોવા મળતાં સ્થાનિક સ્તરે આયોજન અને લોકસંપર્ક સામે ગંભીર ચર્ચાઓ શરૂ થઈ છે.
ખુરશીઓ ભરવા વિદ્યાર્થીઓને લવાયાનો દાવો, ગરમીમાં છાત્ર બેભાન
સ્થાનિક સૂત્રો અને પ્રત્યક્ષદર્શીઓના આક્ષેપો અનુસાર, સભાખંડમાં ખુરશીઓ ખાલી ન દેખાય તે હેતુથી સ્થાનિક ખાનગી શાળાઓ તેમજ GMERS મેડિકલ કોલેજના વિદ્યાર્થીઓને કાર્યક્રમ સ્થળે ઉપસ્થિત રાખવામાં આવ્યા હતા. કાળઝાળ ગરમી અને અસહ્ય બફારા વચ્ચે યોજાયેલા આ કાર્યક્રમ દરમિયાન એક વિદ્યાર્થીને ચક્કર આવી જતાં તાત્કાલિક સારવાર અર્થે ખસેડાયો હોવાની માહિતી સામે આવી છે; જોકે આ અંગે વહીવટી કે આરોગ્ય તંત્ર તરફથી સત્તાવાર પુષ્ટિ મળી શકી નથી. શૈક્ષણિક સંસ્થાઓના વિદ્યાર્થીઓની હાજરી સ્વૈચ્છિક હતી કે આયોજકો દ્વારા દબાણપૂર્વક કરાવાઈ હતી, તેમજ આટલી ગરમીમાં તેમના સ્વાસ્થ્ય અને સુરક્ષાની યોગ્ય વ્યવસ્થા હતી કે કેમ, તેવા અનેક ગંભીર પ્રશ્નો વાલીઓ અને નાગરિકોમાં ચર્ચાઈ રહ્યા છે.
વડાપ્રધાનના વર્ચ્યુઅલ સંબોધન સમયે જ ખુરશીઓ ખાલી થઈ
કાર્યક્રમ દરમિયાન જ્યારે દેશના વડાપ્રધાનનું વર્ચ્યુઅલ સંબોધન શરૂ થયું, ત્યારે પણ સભાખંડમાંથી અનેક લોકો તેમજ વિદ્યાર્થીઓ ધીમે-ધીમે બહાર નીકળતા જોવા મળ્યા હોવાનો દાવો કરવામાં આવી રહ્યો છે. પરિણામે, કાર્યક્રમની પૂર્ણાહુતિ સુધીમાં સામેનો મોટો બેઠક વિસ્તાર ખાલીખમ દેખાતો હોવાના દૃશ્યો સોશિયલ મીડિયા અને રાજકીય વર્તુળોમાં ભારે ચર્ચાનું કેન્દ્ર બન્યા છે.
રાજકીય કાર્યક્રમોમાં ભીડ અને લોકભાગીદારીને સફળતાનો મુખ્ય માપદંડ ગણવામાં આવે છે. આવા સંજોગોમાં મંચ પર નેતાઓનો જમાવડો અને સામે ખાલી ખુરશીઓનું દૃશ્ય સંગઠનના આયોજન અને જમીની સંકલન પર મોટા સવાલો ખડા કરે છે. હવે જોવાનું એ રહે છે કે ભાજપ સંગઠન કે સ્થાનિક આયોજકો દ્વારા વિદ્યાર્થીઓની હાજરી અને આ ખાલી બેઠક વ્યવસ્થા અંગે કોઈ સત્તાવાર ખુલાસો કરવામાં આવે છે કે નહીં.
