હળવદ, તા.8 પ્રજાની સુરક્ષા સાથે વિશ્વાસ જાળવવાની દિશામાં હળવદ પોલીસે વધુ એક પ્રશંસનીય કામગીરી કરીને રૂ. 3,80,961 કિંમતના 19 ખોવાયેલા અને ચોરાયેલા મોબાઇલ ફોન શોધી તેમના અસલ માલિકોને પરત સોંપ્યા છે. આધુનિક ટેક્નોલોજી અને સતત મોનિટરિંગના ઉપયોગથી થયેલી આ કામગીરી રાજ્યમાં પ્રજાલક્ષી પોલીસિંગનું સકારાત્મક ઉદાહરણ બની છે.આ કામગીરી સરહદી રેન્જ ભુજના પોલીસ મહાનિરીક્ષક નિરજા કોરડિયા, મોરબી જિલ્લા પોલીસ અધિક્ષક મુકેશ પટેલ અને નાયબ પોલીસ અધિક્ષક એસ. એફ. સારડાના માર્ગદર્શન હેઠળ હાથ ધરવામાં આવી હતી. હળવદ પોલીસ સ્ટેશનના પોલીસ ઇન્સ્પેક્ટર આર. ટી. વ્યાસના સુપરવિઝનમાં પોલીસ કોન્સ્ટેબલ યુવરાજસિંહ નિરુભા જાડેજાએ CEIR પોર્ટલનો અસરકારક ઉપયોગ કરી ટેક્નિકલ વર્કઆઉટ અને સતત મોનિટરિંગ દ્વારા મોબાઇલ ફોન શોધી કાઢ્યા હતા. સમગ્ર બીટ અને ઓ.પી. સ્ટાફે પણ આ કામગીરીમાં મહત્વપૂર્ણ સહયોગ આપ્યો હતો.
ડિજિટલ યુગમાં મોબાઇલ માત્ર સંચારનું સાધન નહીં પરંતુ વ્યક્તિગત માહિતી, બેન્કિંગ અને રોજિંદા જીવનનો મહત્વનો ભાગ બની ગયો છે. આવા સમયે ખોવાયેલો મોબાઇલ પરત મળવો નાગરિકો માટે મોટી રાહત સમાન છે. CEIR જેવી કેન્દ્ર સરકારની વ્યવસ્થાનો અસરકારક ઉપયોગ કરીને પોલીસ માત્ર ગુનાઓની તપાસ પૂરતી મર્યાદિત નથી રહી, પરંતુ નાગરિકોને સીધો લાભ પહોંચાડતી સેવા પણ આપી રહી છે.હાલની પરિસ્થિતિમાં ગુજરાત પોલીસ ટેક્નોલોજી આધારિત કામગીરીને વધુ પ્રાધાન્ય આપી રહી છે. હળવદ પોલીસની આ કામગીરી દર્શાવે છે કે યોગ્ય માર્ગદર્શન, ટેક્નિકલ કુશળતા અને ટીમવર્કના સમન્વયથી પ્રજાનો વિશ્વાસ વધુ મજબૂત બની શકે છે.આ સફળ કામગીરીથી “પોલીસ પ્રજાની મિત્ર છે”નો સૂત્ર માત્ર શબ્દોમાં નહીં પરંતુ કાર્ય દ્વારા પણ સાબિત થયો હોવાનું સ્થાનિક નાગરિકોમાં ચર્ચાઈ રહ્યું છે.
