ગાંધીનગર:
રાજ્યમાંથી કુપોષણને નાથવા અને સ્વસ્થ સમાજના નિર્માણ માટે મુખ્યમંત્રી ભૂપેન્દ્રભાઈ પટેલના માર્ગદર્શન તથા મહિલા અને બાળ વિકાસ મંત્રી ડૉ. મનીષાબેન વકીલના નેતૃત્વ હેઠળ સમગ્ર રાજ્યમાં ‘પોષણ માહ-2026’ની જોરશોરથી ઉજવણી કરવામાં આવી રહી છે. *‘આપણી આંગણવાડી, આપણી જવાબદારી’*ના મંત્ર સાથે ચાલી રહેલા આ જનઆંદોલનમાં ગુજરાતે દેશભરમાં અગ્રેસર સ્થાન હાંસલ કર્યું છે. સરકારી આંકડા અનુસાર, રાજ્યભરમાં અત્યાર સુધીમાં 2.43 કરોડથી પણ વધુ પ્રવૃત્તિઓ સફળતાપૂર્વક સંપન્ન કરવામાં આવી છે.
પ્રથમ 1000 દિવસની કાળજી અને આંગણવાડીઓની સક્રિય ભૂમિકા
કુપોષણ સામેની આ વૈજ્ઞાનિક લડાઈમાં બાળકના જન્મ પછીના પ્રથમ 1000 દિવસને અતિ મહત્વપૂર્ણ ગણવામાં આવ્યા છે. આ નિર્ણાયક સમયગાળા દરમિયાન બાળકોના પોષણ અને આરોગ્યની વિશેષ તકેદારી રાખવામાં આવી રહી છે. રાજ્યભરના આંગણવાડી કેન્દ્રો મારફતે બાળકોનું નિયમિત વજન અને ઊંચાઈનું ડિજિટલ માપન, પોષણની સ્થિતિનું ટ્રેકિંગ અને તે મુજબ માતાઓને જરૂરી પોષણ આહાર અંગે માર્ગદર્શન પૂરું પાડવામાં આવી રહ્યું છે.
મિલેટ્સને પ્રાધાન્ય, જંકફૂડ સામે લાલબત્તી
આ વર્ષે પોષણ માહ દરમિયાન બાળકો, સગર્ભા માતાઓ અને ધાત્રી માતાઓના આહાર પર વિશેષ ધ્યાન કેન્દ્રિત કરવામાં આવ્યું છે:
- સ્થાનિક પૌષ્ટિક આહાર: બાજરી, જુવાર, રાગી જેવા પરંપરાગત મિલેટ્સ અને સ્થાનિક શાકભાજી-ફળોના ઉપયોગને વિશેષ પ્રોત્સાહન આપવામાં આવ્યું.
- જંકફૂડ સામે જાગૃતિ: પ્રોસેસ્ડ અને જંકફૂડના વધતા ચલણથી બાળકોના સ્વાસ્થ્યને થતા નુકસાન અંગે વાલીઓમાં સઘન જાગૃતિ અભિયાન ચલાવાયું.
- સંતુલિત આહાર: પરિવારોમાં રોજિંદા ભોજનમાં પ્રોટીન, આયર્ન અને વિટામિનયુક્ત આહાર સમાવવા માટે પ્રેરિત કરવામાં આવ્યા.
આ જિલ્લાઓ રહ્યા કામગીરીમાં મોખરે
‘પોષણ સંગમ’ના માધ્યમથી આરોગ્ય, પંચાયત, ગ્રામ વિકાસ અને શિક્ષણ વિભાગના સંયુક્ત સહયોગથી આ અભિયાનને જમીની સ્તર સુધી પહોંચાડવામાં આવ્યું છે. જિલ્લાવાર પ્રદર્શનમાં મહિસાગર, વલસાડ, પાટણ, આણંદ અને મહેસાણા જિલ્લાઓએ શ્રેષ્ઠ અને સૌથી વધુ પ્રવૃત્તિઓ સાથે રાજ્યમાં અગ્રણી સ્થાન પ્રાપ્ત કર્યું છે. આ અભિયાન માત્ર એક માસની ઔપચારિકતા ન બની રહેતાં લોકોની દિનચર્યા અને આહારશૈલીમાં કાયમી હકારાત્મક બદલાવ લાવે તેવો નિર્ધાર વ્યક્ત કરવામાં આવ્યો છે.
