ગુજરાતના યુવાનો અને વિદ્યાર્થીઓમાં સ્પર્ધાત્મક ભાવના ખીલે તથા જ્ઞાન સાથે ગમ્મત દ્વારા તેમનું ભવિષ્ય ઉજ્જવળ બને તે હેતુસર રાજ્ય સરકાર દ્વારા એક અત્યંત મહત્વપૂર્ણ પહેલ શરૂ કરવામાં આવી છે. મુખ્યમંત્રી ભૂપેન્દ્ર પટેલે ગાંધીનગર ટાઉન હોલ ખાતેથી ‘ગુજરાત જ્ઞાનગુરુ ક્વિઝ (G3Q-2026)’ અને ‘સેવા ફર્સ્ટ ઇનોવેશન ચેલેન્જ (SFIC)’નો ભવ્ય શુભારંભ કરાવ્યો છે. આ વખતે આ સ્પર્ધાને આધુનિક આર્ટિફિશિયલ ઇન્ટેલિજન્સ (AI) ટેક્નોલોજી સાથે જોડવામાં આવી છે, જેમાં સ્પર્ધકો માટે કરોડો રૂપિયાના રોકડ પુરસ્કારોની જાહેરાત કરવામાં આવી છે.
મુખ્યમંત્રીનું પ્રેરણાદાયી આહ્વાન – યુવાનો બનશે ‘યોજના દૂત’: કાર્યક્રમમાં ઉપસ્થિત વિદ્યાર્થીઓને માર્ગદર્શન આપતા મુખ્યમંત્રી ભૂપેન્દ્ર પટેલે જણાવ્યું હતું કે, વિદ્યાર્થીકાળ માત્ર ભણવા પૂરતો મર્યાદિત નથી, પરંતુ સમાજ પ્રત્યેની જવાબદારી નિભાવવાનો પણ ઉત્તમ સમય છે. વિદ્યાર્થીઓએ સરકારી યોજનાઓની માહિતી મેળવીને પોતાના પરિવાર, મિત્રો અને જરૂરિયાતમંદ નાગરિકોને લાભ અપાવવા માટે ‘યોજના દૂત’ બનવું જોઈએ. સરકારનો મુખ્ય અભિગમ છે કે છેવાડાના માનવી સુધી કલ્યાણકારી યોજનાઓ પહોંચે.
- કોણ ભાગ લઈ શકે?: ધોરણ 9 થી 12 ના વિદ્યાર્થીઓ, કોલેજના યુવાનો તેમજ રાજ્યના તમામ સામાન્ય નાગરિકો આ સ્પર્ધામાં ભાગ લઈ શકે છે.
- ક્યાં અને કેવી રીતે રમી શકાશે?: આ ક્વિઝ તાલુકા, જિલ્લા અને રાજ્ય એમ ત્રણ સ્તરે યોજાશે. કુલ 8 અઠવાડિયા સુધી ચાલનારી આ ક્વિઝ દર રવિવારથી શુક્રવાર સવારે 8:00 થી રાત્રે 10:00 વાગ્યા સુધી ઓનલાઇન રમી શકાશે.
- રજિસ્ટ્રેશન અને પ્રારંભ: આ ક્વિઝનું રજિસ્ટ્રેશન www.G3Q.ai પોર્ટલ પર શરૂ થઈ ગયું છે અને તા. 20 સપ્ટેમ્બરથી આ સ્પર્ધાનો વિધિવત પ્રારંભ થશે.
- AI આધારિત નવો અનુભવ: આ વર્ષે G3Q ક્વિઝને આધુનિક AI આધારિત લર્નિંગ સિસ્ટમ સાથે જોડવામાં આવી છે, જે દરેક વિદ્યાર્થીને પર્સનલાઇઝ્ડ અભ્યાસનો અદભુત અનુભવ આપશે.
કરોડો રૂપિયાના રોકડ પુરસ્કારો (DBT માધ્યમથી): વિજેતા સ્પર્ધકોને ઉત્સાહ વધારવા માટે આશરે રૂા. 11 કરોડથી વધુના રોકડ પુરસ્કારો રાખવામાં આવ્યા છે, જે સીધા જ વિજેતાઓના બેંક ખાતામાં ‘ડાયરેક્ટ બેનિફિટ ટ્રાન્સફર’ (DBT) દ્વારા જમા કરવામાં આવશે. રાજ્યકક્ષાના ઇનામોમાં શાળાકક્ષાના પ્રથમ વિજેતાને રૂ. 1 લાખ અને કોલેજકક્ષાના પ્રથમ વિજેતાને રૂ. 3 લાખનું માતબર ઇનામ એનાયત કરવામાં આવશે.
‘સેવા ફર્સ્ટ ઇનોવેશન ચેલેન્જ’ (SFIC) ની વિશેષતા: બીજી તરફ, SFIC દ્વારા અંદાજે 20 હજાર યુવા વિદ્યાર્થીઓને વહીવટી તંત્ર અને ઉદ્યોગોની વાસ્તવિક સમસ્યાઓ સાથે જોડીને તેના નવીન અને પારદર્શક ઉકેલો શોધવા માટે પ્રોત્સાહિત કરવામાં આવશે. આનાથી વર્ગખંડનું સૈદ્ધાંતિક જ્ઞાન સીધું જ સમાજ ઉપયોગી બની શકશે અને આ ચેલેન્જમાં પણ રૂા. 1 કરોડના આકર્ષક ઇનામો રાખવામાં આવ્યા છે.
જીવનમાં નિષ્ફળતાથી ક્યારેય ન ડરો – મુખ્યમંત્રી: વિદ્યાર્થીઓને પ્રોત્સાહિત કરતા મુખ્યમંત્રીએ જગદીશચંદ્ર બોઝ, સી.વી. રામન અને ન્યૂટન જેવા મહાન વૈજ્ઞાનિકોના ઉદાહરણો આપ્યા હતા. તેમણે સુંદર વાત કરતા જણાવ્યું હતું કે, જીવનમાં નિષ્ફળતાથી ડરવાની જરૂર નથી, કારણ કે ‘FAIL’ નો સાચો અર્થ ‘First Attempt In Learning’ એટલે કે શીખવાનું પ્રથમ પગથિયું છે. જ્ઞાન આપણને સફળતાના શિખરે પહોંચાડે છે, પરંતુ ત્યાં ટકી રહેવા માટે સંસ્કાર અને સેવાભાવના અનિવાર્ય છે.
