મોરબી: અષાઢી બીજના પાવન અવસરે મોરબી શહેરમાં નીકળેલી રથયાત્રાનું મહેન્દ્રપરા વિસ્તારમાં મોરબી નગરપાલિકાના પૂર્વ ચેરમેન, મુસ્લિમ સમાજના અગ્રણી તેમજ સુન્ની મુસ્લિમ હાલાઈ ઘાંચી સમાજના પ્રમુખ આશિફભાઈ રહીમભાઈ ઘાંચી દ્વારા ભવ્ય સ્વાગત કરવામાં આવ્યું હતું. આ પ્રસંગે આશિફભાઈ ઘાંચીએ રથને ફૂલહાર અર્પણ કરી ભાવપૂર્વક આવકાર્યો હતો. સાથે જ રથયાત્રામાં જોડાયેલા સંતો, આગેવાનો, સેવાભાવી કાર્યકરો અને હજારો ભક્તો માટે ઠંડા પીણાંની વ્યવસ્થા કરવામાં આવી હતી. ભારે ગરમી વચ્ચે આ સેવા યાત્રાળુઓ માટે રાહતરૂપ બની હતી. આ સમગ્ર કાર્યક્રમ દરમિયાન કોમી સૌહાર્દ, પરસ્પર સન્માન અને માનવતાના મૂલ્યોનું જીવંત દૃશ્ય જોવા મળ્યું હતું. વિવિધ સમાજના લોકો એકસાથે જોડાઈ અષાઢી બીજના પાવન પર્વને ભાઈચારા અને એકતાના ઉત્સવમાં ફેરવી દીધો હતો.
આશિફભાઈ ઘાંચીએ જણાવ્યું કે, “ધર્મ અલગ હોઈ શકે, પરંતુ માનવતા સર્વોચ્ચ છે. એકબીજાના તહેવારોમાં સહભાગી બનવાથી સમાજમાં વિશ્વાસ, પ્રેમ અને એકતા વધુ મજબૂત બને છે.” મહેન્દ્રપરામાં થયેલા આ સ્વાગતને સ્થાનિક લોકોએ પણ હાર્દિક વધાવી લીધું હતું. રથયાત્રા દરમિયાન જોવા મળેલો આ કોમી એકતાનો સંદેશ મોરબીની ગંગા-જમુની સંસ્કૃતિ અને પરસ્પર સૌહાર્દનું ઉત્તમ ઉદાહરણ બની રહ્યો હતો. અષાઢી બીજ જેવા ધાર્મિક પર્વે માનવતા, સેવા અને પરસ્પર સન્માનનો સંદેશ આપતી આવી પહેલ સમાજને વધુ સુમેળભર્યો બનાવે છે. વિવિધ ધર્મ અને સમાજના લોકો જ્યારે એકબીજાના સુખ-દુઃખ અને તહેવારોમાં સહભાગી બને છે, ત્યારે સાચા અર્થમાં “એકતા, માનવતા અને રાષ્ટ્રપ્રેમ”ની ભાવના વધુ મજબૂત બને છે. મોરબીમાં જોવા મળેલું આ દૃશ્ય સમાજ માટે પ્રેરણાદાયી અને અનુસરવા યોગ્ય ઉદાહરણ બન્યું છે.
