મોરબી:
ગુજરાત રાજ્ય વાહન વ્યવહાર નિગમ (ST) દ્વારા લેવાતી ડ્રાઈવર અને કંડક્ટરની ભરતી પ્રક્રિયામાં મહત્વના બદલાવ લાવવા માટે મોરબીના જાગૃત નાગરિક અને અન્ન અને પુરવઠા વિભાગ-મોરબીના પૂર્વ સલાહકાર પી.પી. જોશી દ્વારા રાજ્યના મુખ્યમંત્રીને એક લેખિત રજૂઆત કરવામાં આવી છે. તેઓએ માંગ કરી છે કે એસ.ટી.ની ભરતી પ્રક્રિયા મધ્યસ્થ કચેરીના બદલે દરેક વિભાગીય કચેરી (ડેપો/વિભાગ સ્તરે) ખાતેથી જ કરવામાં આવે.
વધુ ભણેલા ઉમેદવારોને કારણે કુશળ ડ્રાઈવરો મેરિટમાંથી બહાર?
રજૂઆતમાં જણાવ્યા મુજબ, હાલની ભરતી પ્રક્રિયા મધ્યસ્થ કચેરીના નિયમોને આધીન હોવાથી શૈક્ષણિક લાયકાત (ધો. 10-12 પાસ) અને લાંબો અનુભવ ધરાવતા અસલી કૌશલ્યવર્ધક ડ્રાઈવરો અન્યાયનો ભોગ બની રહ્યા છે. ઘણા એવા ડ્રાઈવરો છે જેઓ પ્રેક્ટિકલ પરીક્ષામાં 50માંથી 50, 49, 48 કે 47 જેવા ઊંચા માર્ક્સ મેળવે છે, પરંતુ ઓછી શૈક્ષણિક લાયકાતના કારણે તેઓ ફાઇનલ મેરિટમાં સ્થાન મેળવી શકતા નથી.
બીજી તરફ, વધુ અભ્યાસ ધરાવતા ઉમેદવારો ઊંચા મેરિટના કારણે પસંદગી પામી જાય છે. પરંતુ માત્ર 90 દિવસની ડેમો ટ્રેનિંગ અને પ્રેક્ટિકલમાં ઓછા માર્ક્સ હોવા છતાં તેઓ નોકરી મેળવી લે છે. આવા ઉમેદવારોને ઘણીવાર રોડ ટ્રાફિક નિયમોનું પૂરતું વ્યવહારિક જ્ઞાન હોતું નથી, જેના કારણે અકસ્માતોનું જોખમ પણ વધી શકે છે.
વિભાગીય કક્ષાએ ભરતી કરવાથી થનારા ફાયદા:
પી.પી. જોશીએ રજૂઆતમાં જણાવ્યું છે કે જો ગુજરાતના દરેક એસ.ટી. વિભાગ ખાતે સ્થાનિક સ્તરે ભરતી પ્રક્રિયા હાથ ધરવામાં આવે તો તેનાથી નીચે મુજબના મોટા ફાયદા થશે:
• નિગમને આર્થિક બચત: સેન્ટ્રલ લેવલે થતા મોટા ખર્ચની સામે વિભાગીય સ્તરે ભરતી કરવાથી લાખો રૂપિયાના ખર્ચની બચત થશે.
• અકસ્માતોમાં ઘટાડો: પ્રેક્ટિકલ માર્ક્સ અને ભારે વાહન (Heavy Vehicle) ચલાવવાનો વધુ વર્ષોનો અનુભવ ધરાવતા કુશળ ડ્રાઈવરોની પસંદગી થવાથી અકસ્માતો નિવારી શકાશે અને એસ.ટી. નિગમની પ્રતિષ્ઠા વધશે.
• સ્થાનિક રોજગારી અને નોકરીની સ્થિરતા: દરેક જિલ્લાને પોતાના નજીકના તાલુકા કે ગ્રામ્ય વિસ્તારના ડ્રાઈવરો મળશે. સ્થાનિક નોકરી હોવાથી તેઓ અન્ય જોબ તરફ આકર્ષાશે નહીં અને એસ.ટી.ની નોકરી છોડશે નહીં, જેથી નિગમની પરિવહન સેવા વધુ તંદુરસ્ત અને મુસાફરો માટે હિતદાયક બનશે.
• સમાન તકો: સૌરાષ્ટ્ર સહિતના એવા ઉમેદવારો જેઓ અનુભવી છે, પ્રેક્ટિકલમાં મોખરે છે પરંતુ ઓછું ભણેલા હોવાથી અન્યાયનો ભોગ બને છે, તેમને ન્યાય મળશે.
મુખ્યમંત્રી સમક્ષ કરવામાં આવેલી આ રજૂઆતમાં સ્થાનિક રોજગારી અને એસ.ટી. તંત્રના લાંબા ગાળાના હિતને ધ્યાને રાખીને સરકાર આ બાબતે વહેલી તકે યોગ્ય અને સકારાત્મક નિર્ણય લે તેવી આશા વ્યક્ત કરવામાં આવી છે.
