હળવદ:
મોરબી જિલ્લામાં કાયદો અને વ્યવસ્થા જાળવી રાખવા તેમજ શરીર સંબંધી ગુનાઓ આચરતા માથાભારે તત્વોને નાથવા માટે પોલીસ તંત્ર એક્શન મોડમાં આવ્યું છે. હળવદ પોલીસ દ્વારા વિસ્તારના એક કુખ્યાત ઇસમને પાસા (PASA) હેઠળ ડિટેઇન કરી જેલ ભેગો કરવામાં આવ્યો છે.
શું છે સમગ્ર મામલો?
રાજકોટ વિભાગના પોલીસ મહાનિરીક્ષક અને મોરબી પોલીસ અધિક્ષકની સૂચના મુજબ, ગંભીર ગુનાઓમાં સંડોવાયેલા ઇસમો વિરુદ્ધ કડક કાર્યવાહીના ભાગરૂપે હળવદ પોલીસે દરખાસ્ત તૈયાર કરી હતી. હળવદના બસ સ્ટેન્ડ પાછળ, કૃષિ વિદ્યાલય વાળી શેરીમાં રહેતા જયેશ કાળુભાઈ પરમાર નામના ઇસમ વિરુદ્ધ મારામારીના અનેક ગુનાઓ નોંધાયેલા હતા.
પોલીસની કાર્યવાહી
જયેશ પરમારની માથાભારે પ્રવૃત્તિઓને જોતા હળવદ પોલીસ ઇન્સ્પેક્ટર દ્વારા પાસા દરખાસ્ત મોકલવામાં આવી હતી, જેને મોરબી જિલ્લા મેજિસ્ટ્રેટ દ્વારા મંજૂર કરી પાસા વોરંટ ઇસ્યુ કરવામાં આવ્યું હતું. વોરંટ મળતા જ હળવદ પોલીસે અલગ-અલગ ટીમો બનાવી આરોપીને ઝડપી પાડ્યો હતો અને કાયદેસરની કાર્યવાહી કરી તેને જેલ હવાલે કર્યો છે.
પોલીસની આ કડક કાર્યવાહીથી ગુનાહિત પ્રવૃત્તિ કરતા તત્વોમાં ફફડાટ વ્યાપી ગયો છે.
